Uf d'r Nebabah!

1. Überfüllt

"Sia, Herr Fürschtand, Donnerwetter,
ischt des et a ************
In deam ganza Bommelzügle
ischt koi oizigs Plätzle frei.

Waga, Trittbrett, Stiaga, Puffer,
überall isch g'wuslet voll,
saget Sia mir no gefälligscht,
mo i mi platziera soll.

Des send Zuaschtänd, heiligs, siedigs,
uf der Heckabeerlesbah!
Hent'r bloß so wenig Wäga,
henket Kenderwäga-n-a"!

"Send Se no et gar so hitzig,
Herr, miar könnet nex d'rfür-
des send gar et z'wenig Wäga,
des send bloß z'viel Passaschier."

2. A kleine Verspäteng

"Henta fertig!" schreit d'r Schaffner-
's Zügle hot an Schnaufer dau,
hot no gottsalmächtig pfiffa-
so, jetzt ka mr's laufa lau.

"Oha!" brüllt von weitem oiner,
und a Karra rasslet rei,
"mir müeßt no a sau verlada,
dui mueß heut no z'Stuegert sei.

Vorwärts! et lang gota Morga,
machet doch da Waga auf!
So, jetzt nemm i d'Sau am Kraga,
und ihr lupfets henta nauf."

Doch dem Viech isch gar et wichtig,
's Fahra uf d'r Neababah.'
und se macht en Satz vom Waga,
sprngt d'rvo', so schnell se ka.

Guck, des Lompatier, des narret,
lauft en Flecka wieder nei,
und sechs starke Männer rennet
wia sechs Teufel henta drei'.

' sischt a Viertelstond verganga,
bis se's wieder eigfanga hent,
jerum, wia-a dia Manna schwitzet-
so a sau hot Temperament.

's Zügle wartet ganz geduldig,
maulet tent bloß Passaschier-
dia, mo d'Sachlag glei erfasset,
holet sich en Hafa Bier.

D'Sau mueß schließlich doch en Waga,
Prügel hot se gnueg vertwischt,
und m'r sieht dia blaue Mäler
z'Stuegert, wenn se g'gmetzget ischt.

"Henta fertig!" brüllt d'r Schaffner-
's Zügle hot en Pfuzger dau-
mit'ra halba Stond Verspäteng
ka m'r's endlich laufa lau.

3. A Verkehrshindernis

Holla, mittla uf d'r Strecke
bleit uf oimaol's Zügle schtau,
hot no gottsallmächtig pfiffa
und en arger Rompler dau.

Etlich Dickköpf bocklet zema-
Herr, des ischt a Schrecka gwea!
Gucket, wia d'r Hoizer fuchtlet,
do ischt gwiß a O'glück g'scheha!

d'Mannsleut weret blaß und blässer,
d'Kender brüllet mordio,
Weiber fallet drei en Oh'macht,
und a Dachshond rennt d'drvo'.

Neamer will em Zug mai bleiba,
älles druckt em Ausgang zua,
z'mol schreit oiner ganz d'rvorna:
"Uf em Bah'damm stoht a Kuah!"

's geit no mancherloi Debatta,
bis a jeder Fahrgascht woiß:
's Zügle ka et weiterfahra,
s' stoht a Rendviech uf em Glois.

4. Abschied

D'Frau und d'Kender send em Jammer,
weil d'r Vatter roisa mueß,
älle wenket em am Bah'hof
fufzeahamol da letschta Grueß.

's Leaba hot er wohl versichert,
denn m'r tuet halt, was m'r ka-
O'glück über O'glück liest m'r
äll Tag von d'r Eisabah'.

Und's klei Luisle heult"" O Papa,
daß grad du verroisa muescht!
Gelt, tua jo fei recht aufpassa,
daß du et entglosa tuascht!"

(Lina Stöhr)

Also i frog me jetzt, was an dem Wort "Sch..lamperei" schlemm dro isch.

Da kann nix Schlimmes dran sein - bei den allermeisten gehörts sowieso zur persönlichen Note