Return to Website

Betzinger Hocketse

In diesem Forum könnt ihr Nachrichten hinterlassen, Kritik üben, Bilder posten, Fragen stellen und......... . Mehr Kommunikationsmöglichkeiten bietet Werners Deutsch-Amerikanisches Forum, allerdings muss man sich dort registrieren um lesen oder posten zu können


Betzinger Hocketse
Start a New Topic 
Author
Comment
Sonntagsgedichtle

E Grond zom Feste'

Mei' Dackel, der Fetz, hot a Mäusle vertwischt,
ond i hätt em Lotto fast gwonne',
ond wenn mr au grad uf de Hond komme'-n ist,
mr sott au em Wirt ebbes gonne'!
E Viertele Wei'
wenn s sei' muaß, au maih!
Mr pfeifet uf Sorge' ond Breste',
Wer sich ebbes gonnt,
fendt emmer en Grond,
en Grond halt zom Feire' ond Feste'!

Mei'Weib hot Geburtstag, ond i gratulier:
I wönsch-ere', daß se em Schwong bleibt,
ond daß se-i woiß schao', des leit au an mir-
em Herze' dren älle'weil jong bleibt.
E Viertele Wei',
wenn s sei' muaß au maih!
Mr pfeifet uf Sorge'ond Breste'.
Wer sich ebbes gonnt,
fendt emmer en Grond,
en Grond halt zom Feire'ond Feste'!

Dr Storch loht dr Gretel om d Welt halt koi'Ruah
ond beißt se äll Johr gschwend ens Wädle.
Ihr Hans ist e Schaffer ond wönscht sich en Bua.
Doch s elfte Mol isch au bloß e Mädle!
E Viertele Wei',
wenn s sei' muaß, au maih!
Mr pfeifet uf Sorge' ond Breste'.
Wer sich ebbes gonnt,
fendt emmer en Grond,
en Grond halt zom Feire'ond Feste'!

Letzt sieh-n-i per Zuafall de Sepp uf dr Gaß.
Mr hent ons zeah Johr nemme troffe',
E Glatze hot der ond en Bauch wia-n-e Faß
ond s Weib ist-em lang schao' vertloffe'.
E Viertele Wei',
wenn s sei' muaß, au maih!
Mr pfeifet uf Sorge' ond Breste'.
Wer sich ebbes gonnt,
fendt emmer en Grond,
en Grond halt zom Feire'ond Feste'!

I hao' mit verlaub jetz e künstlichs Gebiß
ond ka'wieder beiße'ond nage',
Blos wenn-e zom Vesper drei Schweinsknöchle'iß,
spür i halt en Druck uf-em Mage'.
E Viertle Wei',
wenn s sei'muaß, au maih!
Mr pfeifet uf Sorge'ond Breste'.
Wer sich ebbes gonnt
fendt emmer en Grond,
en Grond halt zom Feire'ond Feste'!

Mr went vo'Geburt a'zwor älter, doch alt,
vo'weage', des werdet mir ette'.
E Johrgang, e guater, der hält sich halt
fast wia uf-me Locke'kopf Klette'.
E Viertele Wei',
wenn s sei' muas, au maih!
Mr pfeifet uf Sorge'ond Breste'.
Wer sich ebbes gonnt,
fendt emmer en Grond,
en Grond halt zom Feire'ond Feste'!

(Heinz Eugen Schramm)

Re: Sonntagsgedichtle

Wäre ja wirklich schlimm, wenn wir nicht immer einen Grund zum Feiern und "feschten" finden würden, gell Hanne?