Jetz isch g'wonne'


I woiß net, mir isch heut so pudeleswohl,
i kööt ganze Bööm rausraiße'!
grad nausjuchzge' möcht-e! - I ka nix dazua,
ond sott me au s Mäusle gaoh' beiße'!

Heut be'-n-e e Kerle! - Ond kommt-es druf a',
i mach uf-em Märktplatz - sell moin-e-
en Handschtand-vo'mir aus, wenn s sei' muaß, au zwoi!
Noi', Hemmonge' hao'n-e koine!

Mag komme', was will! - I pfeif druf ond lach!
Mir ka' mr koi' Supp heut versalze'!
I glaub, i wär gar em Stand ond tät
mei Schwiegermuater omhalse'...

s nächst beste alt Weib möcht-e holle' zom Tanz;
worom net?- Es wurd noh schao' hopse'!
Onterm Feaster verkuß-i mein Hausdrache' heut,
ond mag des au Nochbere mopse'!

I ka's net verhebe', ond wenn-e grad möcht;
drom juckt me s vor Freud en de Glieder.
Mei' Herz, des macht Höpser ond Purzelbööm!
so ist-es noh emol wieder!

Worom?-Wer wurd froge'? Narr, ufwärts goht's!
Äll Tag tuaet s e bißle en Rucker:
Wer s jetz noch net spürt, daß-es Frühjohr wurd,
der ist zom Bedaure', der Schlucker!

(H.E. Schramm)

Ma sodd et glauba, was das Frühjahr alles bewirken kann.....

sell isch gwiss wohr